الفهامة

عادةً تبدو الفلسفة كإنها نظرية بعيدة عن المهام اليومية، كإنها أثر من الماضي زي الأهرامات وأبو الهول، يعني عظيمة لكن بدون فائدة، خاصةً في العالم الرأسمالي التكنولوجي الأكل-عيشي الحديث. الفلسفة تبدو كإنها تضييع وقت (ما تِتفلسِفش يا أخي...) أو عقيدة شخصية (فلسفتي في الحياة هي...)، في أحسن الأحوال الفلسفة عبارة عن نظرية قديرة لكن مش متقدرة، وفي أسوأ الأحوال بتضُر أكل العيش والأخلاق. في رأيي إن كل الآراء دي خاطئة، لكن الخطأ نفسه مُعبِّر. لما نعتبر إن الفلسفة نظرية عاجزة سَهْوَكيَّة عقائديَّة كونية، فده مش مجرد عشان إحنا جاهلين ومش فاهمين، إنما كمان عشان الفلاسفة غرقانين في عالم من النصوص،واحد فوق التاني، بدون أي صلة بالواقع اليومي. اللغة معقدة، والمصادر غامضة، وأحياناً النصوص نفسها مش مترجمة ولا متاحة. ده مش معناه إن الفلسفة ما عادِتش مهمة، بس معناه إننا لازم نشرحها تاني ونشرح أهميتها.. وده طموح «الفهَّامة». ونرجع نقول: «...وبرضه مش فاهم !!...» من فهَّامة صلاح جاهين